Facebook Ispaniyada “soxta xabarlar” bilan kurash bo‘yicha ofisini ochadi

Facebook kompaniyasi “soxta xabarlar” bilan kurashish maqsadida Barselona shahrida vakolatxona ochadi. Bu haqda “RIA Novosti” xabar berdi.

Ofis mashhur Agbar minorasida sakkizta qavatni egallaydi va Competence Call Center kompaniyasning 500 nafar xodimi joylashtiriladi. Ish izlovchilarga qo‘yiladigan talab fransuz, ispan, dat, shvet, italyan, norveg va portugal tillarini bilish hisoblanadi. Bundan tashqari kompaniya, dasturchilarni ham ishga olishini e’lon qilgan.

Ayni paytda bu kabi markaz Germaniyaning Essen shahrida joylashgan.

Avvalroq Facebook rahbari Mark Sukerberg joriy yilning oxiriga qadar 20 mingdan ortiq xodimni ishga olishini ma’lum qilgan. Ular foydalanuvchilar ma’lumotlarining saqlanishi yuzasidan nazoratni amalga oshiradi.