Ilon Mask tomonidan asos solingan Tesla elektrokarlar ishlab chiqaruvchi kompaniyasi bir daqiqada 6,5 ming dollar sarf qilishi ma’lum bo‘ldi, deb yozadi Bloomberg.
Kompaniya 2017-yilni 3,4 milliard dollar naqd pul va 9,4 milliard dollar qarz bilan yakunladi. Agar avtomobil ishlab chiqaruvchi kompaniya shunday sur’atda pul sarf qilishda davom etsa, 2018-yilda qo‘shimcha moliyalashtirishsiz naqd pulsiz qoladi.
Tesla yaratilganidan keyingi yetti yil davomida (2003-yilda asos solingan) o‘z mablag‘lari va venchur fondlari mablag‘lari hisobiga yashagan, moliyalashtirishning katta qismi Maskning hissasiga to‘g‘ri kelgan. Shu bilan birga, Bloomberg yozishicha, kompaniya AQSh hukumati tomonidan o‘zgacha qo‘llab-quvvatlanadi (hech bir boshqa avtomobil ishlab chiqaruvchi bunday ko‘makka ega emas).
Masalan, 2010-yilda Tesla energetika vazirligidan 465 million dollar kredit olgan, uni 2013-yilda yopgan.
Shuningdek, 2010-yilda Tesla xodimlari soni 899 nafar bo‘lgan bo‘lsa, 2018-yil boshiga kelib, ular 40 ming kishiga yetgan. Ishchilar yollanishining davom etishi pul sarfini yanada ko‘paytiradi. 2014-yildan 2017-yilgacha Tesla xodimlari soni uch baravar oshgan, ammo kompaniyaga bir kishi tomonidan keltiriladigan daromad o‘smagan.
Bundan tashqari, kompaniya Tesla Model 3 avtomobilini ishlab chiqarish bo‘yicha o‘z rejalarini bajarmagan. Bloomberg fikricha, bularning barchasi kompaniya taqdiri haqidagi jiddiy xavotirga sabab bo‘lmoqda. Tesla navbatdagi moliyaviy hisobotini 2-may kuni taqdim etadi.
Izoh (0)