Instagram o‘zining to‘lov tizimini ishga tushirmoqda

Instagram ayrim foydalanuvchilar uchun o‘zining elektron to‘lov funksiyasini ishga tushirmoqda. Bu haqda TechCrunch nashriga tayanib, “Korrespondent.net” xabar berdi.

Yangi funksiya kredit kartasini profilning bir qismi sifatida ro‘yxatdan o‘tkazish, PIN-kodni sozlash, shundan so‘ng xaridlarni Instagram’dan chiqmasdan turib amalga oshirish imkoniyatini taqdim etadi.

Instagram matbuot kotibi chiptalarni bron qilish, shuningdek, restoran va salonlarda to‘lovlarni amalga oshirishga yordam beradigan to‘lov vositasi paydo bo‘lganini tasdiqladi, biroq bundan hozircha cheklangan miqdordagi hamkor servislar foydalana olishini ma’lum qildi. Tez kunlarda kino chiptalarini ham Instagram orqali xarid qilish mumkin bo‘ladi.

Ta’kidlanishicha, mazkur yangilik reklama beruvchilar uchun jiddiy rag‘batga aylanadi, chunki Instagram’ning bu servisi xaridlarni osonlashtiradi va vaqtni tejashga xizmat qiladi. Bundan tashqari Instagram Payments foydalanuvchilarni o‘z-o‘zidan paydo bo‘ladigan ko‘proq xaridlarni amalga oshirishga majburlaydi.