Tesla va Space X kompaniyalari asoschisi Ilon Mask qandolatchilik biznesi bilan shug‘ullanish niyatini ma’lum qildi, deya xabar bermoqda Meduza.
Biznesmen tvitterdagi sahifasida: “Men shirinliklar ishlab chiqarishga ixtisoslashgan kompaniya ochaman”, — deb yozib, niyati “super-puper darajada jiddiy” ekanini qo‘shimcha qildi. U, shuningdek, o‘z obunachilaridan ular Ilon Maskdan qanday shirinlikni olishni istashlariga qiziqib, “kriptokonfet” yaratishni ham taklif qildi.
Qandolat fabrikasi haqidagi g‘oya Maskning Berkshire Hathaway investitsiya xoldingi rahbari Uorren Baffet bilan sirtqi bahsining davomi bo‘ldi.
Avvalroq Tesla’ning navbatdagi zararlari haqida e’lon qilingan kompaniya aksiyadorlari yig‘ilishida Ilon Mask Baffetning “iqtisodiy handaq” konsepsiyasini — kompaniyaga tarmoqdagi o‘rtacha ko‘rsatkichdan ko‘ra ko‘proq daromad olish imkonini beruvchi uzoq muddatli raqobat ustunligi nazariyasini tanqid qilgan edi.
Bunga javoban Uorren Baffet o‘zining See’s Candies qandolatchilik fabrikasida “iqtisodiy handaq” konsepsiyasi muvaffaqiyatli ro‘yobga chiqarilganini misol qilib keltirgan va ushbu biznesda Mask uni hech qachon yuta olmasligini taxmin qilgan edi.
Ilon Mask esa Twitter’dagi sahifasida “handaq qazib, uni konfetlarga to‘ldirib tashlashga” va’da berdi, shuningdek, uning uning qandolatchilik loyihasiga “investitsiya kiritishdan o‘zini tiya olmasligi”ni ham qo‘shimcha qildi.
Elektrokarlar va kosmik kemalar ishlab chiqarishdan tashqari, Ilon Mask Los-Anjeles shahri ostida tunnellar qazish bilan shug‘ullanuvchi, shuningdek, o‘tsochar ishlab chiqaruvchi The Boring Company shirkatiga ham egalik qiladi. Bundan tashqari, bu ishbilarmon yaqinda Thud nomli “galaktikalararo media-saltanat”ga asos solish istagini ham bildirgan edi.
Izoh (0)