Inobat Mahmudova Samarqand davlat tibbiyot institutiga o‘qishga kirish uchun imtihon topshirdi. Abituriyent sinovda 127,5 ball to‘pladi. Afsuski, bu natija talaba bo‘lish uchun yetarli emasdi, deya xabar beradi O‘zA.
Dilbandini mamnun hamisha ko‘rish, uni oliy o‘quv yurtiga o‘qishga kiritish istagida bo‘lgan Obidjon Jalolov vaziyatdan chiqishning “yo‘l”larini qidira boshladi. Unga-bunga maslahat soldi, tanishi Ahror qo‘lidan har qanday ish keladigan Rafiq ismli oshnasi borligini aytib qoldi.
Birinchi uchrashuvdayoq Obidjon Rafiqning uddaburon yigit ekaniga ishondi. Uddaburon esa Davlat test markazida tanishi borligini, u bilan maslahatlashib, javobini aytishini bildiradi. Javob ko‘p kuttirmadi: “Qizingiz ‘super kontrakt’ asosida o‘qishga kirdi hisob. Faqat 7 ming ko‘ki xarajati bor”. Ular kelishishdi.
Oradan ko‘p o‘tmay Obidjon Rafiq bilan Jizzaxda uchrashdi. Unga 3,5 ming dollar berdi. Kelishuvga ko‘ra qolganini ham kechiktirmadi.
Afsuski, “masala” o‘z yechimini topmadi — Inobat talaba bo‘lmadi. Obidjon telefon qilishdan erinmadi, Rafiq esa uni aldashni davom ettiraverdi. Umidvor ota o‘z xatosi – aldanganini tushunguncha ancha vaqt o‘tib ketdi.
Shunday qilib, Navoiy viloyati, Karmana tumanida yashovchi Obidjon Jalolov Jizzax viloyati, Jizzax shahrida istiqomat qiluvchi Rafiq Ahadovning qilmishlari ustidan ichki ishlar idorasiga ariza yozdi.
Mazkur holat yuzasidan tergov-surishtiruv ishlari olib borilmoqda.
Izoh (0)