Инобат Маҳмудова Самарқанд давлат тиббиёт институтига ўқишга кириш учун имтиҳон топширди. Абитуриент синовда 127,5 балл тўплади. Афсуски, бу натижа талаба бўлиш учун етарли эмасди, дея хабар беради ЎзА.
Дилбандини мамнун ҳамиша кўриш, уни олий ўқув юртига ўқишга киритиш истагида бўлган Обиджон Жалолов вазиятдан чиқишнинг «йўл»ларини қидира бошлади. Унга-бунга маслаҳат солди, таниши Аҳрор қўлидан ҳар қандай иш келадиган Рафиқ исмли ошнаси борлигини айтиб қолди.
Биринчи учрашувдаёқ Обиджон Рафиқнинг уддабурон йигит эканига ишонди. Уддабурон эса Давлат тест марказида таниши борлигини, у билан маслаҳатлашиб, жавобини айтишини билдиради. Жавоб кўп куттирмади: «Қизингиз ‘супер контракт’ асосида ўқишга кирди ҳисоб. Фақат 7 минг кўки харажати бор». Улар келишишди.
Орадан кўп ўтмай Обиджон Рафиқ билан Жиззахда учрашди. Унга 3,5 минг доллар берди. Келишувга кўра қолганини ҳам кечиктирмади.
Афсуски, «масала» ўз ечимини топмади — Инобат талаба бўлмади. Обиджон телефон қилишдан эринмади, Рафиқ эса уни алдашни давом эттираверди. Умидвор ота ўз хатоси – алданганини тушунгунча анча вақт ўтиб кетди.
Шундай қилиб, Навоий вилояти, Кармана туманида яшовчи Обиджон Жалолов Жиззах вилояти, Жиззах шаҳрида истиқомат қилувчи Рафиқ Аҳадовнинг қилмишлари устидан ички ишлар идорасига ариза ёзди.
Мазкур ҳолат юзасидан тергов-суриштирув ишлари олиб борилмоқда.
Изоҳ (0)