AQSh prezidenti Donald Tramp Oq uyda shtatlar gubernatorlari bilan uchrashuvda Floridadagi maktabda yuz bergan otishma chog‘ida o‘sha yerda bo‘lganida o‘zini qanday tutgan bo‘lishi haqida gapirib berdi, deb yozadi “Gazeta.ru”.
“Aslida nima ro‘y berishini hech qachon aniq aytib bo‘lmaydi, biroq ishonchim komilki, qo‘limda qurolim bo‘lmasa ham maktab ichkarisiga yugurib kirgan bo‘lardim, o‘ylashimcha, u yerda bo‘lgan har bir kishi shunday yo‘l tutgan bo‘lardi”, — dedi Tramp.
Xabar berilishicha, uchrashuvning katta qismini Tramp Floridadagi maktabda yuz bergan hodisaga bag‘ishlagan.
Donald Tramp 25-fevral kuni Oq uyda shtatlar gubernatorlari uchun uyushtirilgan qabul marosimida Amerika maktablarida otishmalarga boshqa yo‘l qo‘ymaslik kerakligini aytgandi.
Saylov kampaniyasi chog‘ida amerikaliklarning qurol olib yurishi huquqini himoya qilib chiqqan va hukumat odamlarning qanday qurol olib yurishi mumkinligi haqida buyruq bera olmasligini aytgan Tramp 14-fevral kuni Parklend shahridagi maktablardan birida yuz bergan qirg‘indan keyin qattiq tanqidga uchradi. Ushbu maktabning sobiq o‘quvchilaridan biri — 19 yoshli Nikolas Kruz o‘t ochishi natijasida 17 kishi halok bo‘ldi, 14 kishi yaralandi.
Izoh (0)