AQSh moliya vazirligi Rossiyaga qarshi yangi sanksiyalarni yaqin 30 kun ichida kiritishga va’da berdi

AQSh moliya vaziri Stiven Mnuchin Rossiyaga qarshi yangi cheklov choralari 30 kun ichida kiritilishini ma’lum qildi, deb yozadi “RIA Novosti”.

“Biz mavjud barcha sanksiyalarni amalga oshiramiz va yangilarini joriy qilamiz”, — dedi vazir.

Yanvar oyida moliya vazirligi “Kreml ma’ruzasi”ni e’lon qilgach, bir kundan keyin Mnuchin senat eshituvlariga tashrif buyurdi. Yangi sanksiyalar kiritiladigan muddat haqidagi savolga javoban u aniq sanani aytmadi va “hali ko‘p ishlar qilinishi kerakligi” tufayli, o‘z taxminlarida ehtiyot bo‘lishini aytdi.

Rossiya va uning rahbariyatiga qarshi yanada qat’iyroq choralar haqidagi talablarga Mnuchin shunday javob berdi: “Biz hal qilishimiz kerak bo‘lgan muammolar borligi subhasiz, va biz ularni sanksiyalar yordamida hal qilyapmiz”.