АҚШ президенти Дональд Трамп Оқ уйда штатлар губернаторлари билан учрашувда Флоридадаги мактабда юз берган отишма чоғида ўша ерда бўлганида ўзини қандай тутган бўлиши ҳақида гапириб берди, деб ёзади «Газета.ru».
«Аслида нима рўй беришини ҳеч қачон аниқ айтиб бўлмайди, бироқ ишончим комилки, қўлимда қуролим бўлмаса ҳам мактаб ичкарисига югуриб кирган бўлардим, ўйлашимча, у ерда бўлган ҳар бир киши шундай йўл тутган бўларди», — деди Трамп.
Хабар берилишича, учрашувнинг катта қисмини Трамп Флоридадаги мактабда юз берган ҳодисага бағишлаган.
Дональд Трамп 25 февраль куни Оқ уйда штатлар губернаторлари учун уюштирилган қабул маросимида Америка мактабларида отишмаларга бошқа йўл қўймаслик кераклигини айтганди.
Сайлов кампанияси чоғида америкаликларнинг қурол олиб юриши ҳуқуқини ҳимоя қилиб чиққан ва ҳукумат одамларнинг қандай қурол олиб юриши мумкинлиги ҳақида буйруқ бера олмаслигини айтган Трамп 14 февраль куни Паркленд шаҳридаги мактаблардан бирида юз берган қирғиндан кейин қаттиқ танқидга учради. Ушбу мактабнинг собиқ ўқувчиларидан бири — 19 ёшли Николас Круз ўт очиши натижасида 17 киши ҳалок бўлди, 14 киши яраланди.
Изоҳ (0)