Rossiyaning Perm o‘lkasida Pojvinsk kasalxonasida tug‘ilgan ikki qizning onalari oradan 40 yil o‘tib, farzandlari chaqaloqligida almashib ketganidan xabar topdi, deb yozadi “RIA Novosti”. Ular kasalxonani sudga bermoqchi.
Agentlik ma’lumotlariga ko‘ra, 1978-yil 7-martda u yerda to‘rt bola dunyoga kelgan. Tug‘uruqxonadan chiqarishda doyalar o‘sha paytda ko‘zi yorigan ikki ona — Rimma Shvetsova va Yuliya Savelyevaning qizlarini chalkashtirib yuborgan. Shvetsova qizini almashtirib qo‘yishgani haqida kasalxonadan chiqish vaqtidayoq gumon qilgan. Vaqt o‘tishi bilan esa qizcha ota-onasiga o‘xshamasligi aniq bo‘lib borgan, shu sababli oila buzilib ketgan.
Ikkinchi ayol esa o‘tgan yillar davomida begonaning bolasini tarbiyalayotganini xayoliga ham keltirmagan. Shvetsova o‘z shubhalarini ma’lum qilganidan keyingina, oila qizchani tug‘uruqxonada almashtirib qo‘yishganini bilgan.
Shundan so‘ng oilalar DNK-testlarini o‘tkazdi, ular qizlar haqiqatan ham almashib qolganini tasdiqladi.
Izoh (0)