Quddus munitsipaliteti nasroniy konfessiyalardan shaharda joylashgan ko‘chmas mulklari uchun soliq tariqasida 180 million dollardan oshiq mablag‘ undirish niyatida. Bu haqda shahar meri Nil Barkat ma’lum qildi, deya xabar beradi “RIA Novosti”.
“Cherkovlarga tegishli tijoriy maydonlar uchun qarz 650 million shekeldan (salkam 187 million dollar) oshib ketdi. Biz bu og‘irlikni Quddus aholisi zimmasiga yuklash va mazkur ulkan qarzga toqat qilish niyatida emasmiz. Quddusda barcha — nasroniylar, musulmonlar, yahudiylar — qonun oldida barobar”,— dedi Barkat.
Shahar rasmiylari bevosita cherkovlardan tashqari barcha ko‘chmas mulkdan (mehmonxonalar, savdo va ofis binolari) munitsipal soliqlar to‘lashni talab qilmoqda. Ular avvalgi yillar uchun to‘lanmagan soliq uchun ham jarima hisoblab, hisob raqamlarni muzlatishga kirishdi.
Cherkov yetakchilari bu choralarga norozilik belgisi sifatida sayyohlar va ziyoratchilar uchun nasroniylikning asosiy obidalaridan biri — Quddusdagi Iso Masih maqbara-ibodatxonasini yopib qo‘ydi.
Izoh (0)