Isroilning F-16 qiruvchi samolyoti Suriyaning havo hujumidan mudofaa tizimi tomonidan urib tushirildi. Bu haqda 10-fevral kuni Isroil Mudofaa armiyasi ma’lum qildi.
Meduza xabariga ko‘ra, samolyot Shimoliy Isroilda qulagan. Samolyotning har ikkala uchuvchisi katapulta qilgan, ularni shifoxonaga yotqizishgan.
Isroil harbiylarining bayonotiga ko‘ra, samolyot Suriyadagi Eron marralariga qarshi operatsiya vaqtida urib tushirilgan. Ushbu operatsiya Isroil hududida Eronning droni tutib qolinganidan so‘ng boshlangan edi.
Suriyaning SANA axborot agentligi Isroilning bir emas, bir necha samolyotlari urib tushirilgani haqida xabar tarqatdi. Keyinroq Suriya televideniyesi Isroilning yana bir hujumi qaytarilgani haqida axborot bergan.
“Avvalroq Isroil o‘z hududiga uchib kirgan dronlarni bir necha bor urib tushirgan edi. Biroq Eron obyektlariga uyushtirilgan hujumlar Isroilning javob choralari kuchaytirilganidan darak beradi”, — deb yozadi Associated Press.
Suriyada 2011-yildan beri fuqarolar urushi davom etmoqda. Eron mamlakatdagi jangovar harakatlarda prezident Bashar Asad armiyasi tarafida turib qatnashmoqda.
Izoh (0)