Volkswagen odamlar va jonivorlar ustida tajribalar o‘tkazish haqida qaror qabul qilinishiga mas’ul menejerni ishdan chetlatdi

Volkswagen odamlar va jonivorlar ustida tajribalar o‘tkazish haqida qaror qabul qilinishi uchun mas’ul yuqori martabali menejerlardan birini ishdan chetlatdi. Bu haqda kompaniyaning 30-yanvar, seshanba kuni e’lon qilingan bayonotida ma’lum qilingan, deb xabar beradi “TASS”.

Kompaniyaning tashqi aloqalar va rivojlanish masalalari bo‘yicha vakili Tomas Shteg mojaro tafsilotlari aniqlanguncha vazifasidan chetlatildi.

Germaniyaning uch yirik avtokonserni — Volkswagen, BMW va Daimler tomonidan tuzilgan tadqiqot uyushmasi dizel dvigatellari mahsuli bo‘lgan azot dioksidining inson salomatligiga ta’sirini aniqlash uchun odamlar ustida tajribalar o‘tkazishni moliyalashtirishda ishtirok etgan.

Volkswagen ko‘rsatmasiga binoan bunday tajribalar maymunlarda ham o‘tkazilgan.

Germaniya hukumati 29-yanvar, dushanba kuni bunday tajribalarni keskin tanqid qildi va ularni “hech narsa bilan oqlab bo‘lmasligi”ni bildirdi.