O‘zbekiston Respublikasi Prezidenti huzuridagi O‘zbekiston Respublikasining Birinchi Prezidenti Islom Karimov nomidagi ilmiy-ma’rifiy yodgorlik majmuasi tomonidan tegishli vazirlik va tashkilotlar bilan hamkorlikda e’lon qilingan “Islom Karimov xotirasiga bag‘ishlangan eng yaxshi ilmiy-ommabop maqola” tanlovi doirasida “O‘zbekiston” nashriyot-matbaa ijodiy uyida “O‘zbekiston Respublikasining Birinchi Prezidenti Islom Abdug‘aniyevich Karimov faoliyati xronikasi (Solnoma)” chop etildi. Bu haqda O‘zA xabar bermoqda.
“Mazkur nashr Islom Karimovning O‘zbekiston rahbari sifatidagi yigirma yetti yillik faoliyat xronikasini o‘zida mujassam etgan. Solnomani varaqlar ekansiz, Birinchi Prezidentimiz mamlakatimizning murakkab va tahlikali davrida ham, shonli zafarlarga boy paytida ham xalq bilan birga bo‘lgani, xalqning dardu tashvishi, quvonchu shodligi, orzu-istaklarini xuddi o‘zinikidek qabul qilgani, “Islohot – islohot uchun emas, avvalo inson uchun” degan ezgu g‘oyalariga sodiq qolgani, shu yurt, shu el uchun o‘zi aytmoqchi “yonib yashash kerak”ligini amalda isbotlaganiga guvoh bo‘lasiz”, — deyiladi xabarda.
Kitobdan ayrim parchalar keltirib o‘tilgan:
“1989-yil 25-iyun. Islom Karimov Farg‘ona viloyatidagi ijtimoiy-iqtisodiy ahvol bilan tanishish maqsadida ushbu viloyatda bo‘ldi. O‘zbekiston rahbari viloyatning shahar va qishloqlariga borib, yuzaga kelgan notinch vaziyat tufayli jabr ko‘rgan odamlar bilan suhbatlashdi, ahvolni barqarorlashtirish, mavjud ijtimoiy muammolarni hal etish bo‘yicha mahalliy rahbarlarga aniq ko‘rsatmalar berdi.”
“1990-yil 20-iyun. O‘zbekiston SSR Oliy Sovetining ikkinchi sessiyasida Mustaqillik deklaratsiyasi qabul qilindi. Deklaratsiyada huquqiy va demokratik davlat mustaqilligining ustuvorligi, O‘zbekistonning ittifoqdosh respublikalar va boshqa davlatlar bilan munosabatlari shartnomalar asosida belgilanishi va davlat belgilari (gerb, bayroq, madhiya)ni o‘zi ta’sis etishi qayd etildi.”
“1991-yil 31-avgust. O‘zbekiston Prezidenti Islom Karimov Respublika Oliy Kengashining navbatdan tashqari oltinchi sessiyasida ma’ruza qildi. Ushbu sessiyada mamlakatimiz hayotida buyuk tarixiy voqea sodir bo‘ldi. Yurtboshimiz butun dunyoga O‘zbekiston Respublikasi mustaqilligini e’lon qildi. 1-sentabr – Mustaqillik kuni umumxalq bayrami etib belgilandi”.
Tanlovga mamlakat va xorij ommaviy axborot vositalarida chop etilgan, internet nashrlarida e’lon qilingan ko‘plab materiallar, ilmiy-ommabop maqolalar, Birinchi Prezidentning hayoti va faoliyatiga bag‘ishlangan kitob va risolalar kelib tushgan. Nufuzli hay’at a’zolari tomonidan ularning eng yaxshilari saralanib, 2018-yilning I choragida tanlov g‘oliblarining nomlari e’lon qilinadi.
Izoh (0)