Amerikalik harbiy tahlilchi Daniel Ellsberg o‘zining “Qiyomat kuni mashinasi: yadroviy strategning tavbasi” deb nomlangan yangi kitobida Uchinchi jahon urushining ehtimoliy sabablari va uning oqibatlari haqida gapirib berdi, deb yozadi “RIA Novosti”.
Katta ko‘lamli nizoni elektronikadagi nosozlik, OAVdagi yolg‘on xabar yoki bemulohaza buyruq keltirib chiqarishi mumkin. Masalan, Vashington yoki Moskvadagi terakt haqidagi soxta yangilik yadroli adovat uchun yetarlicha asos bo‘la oladi, deb hisoblaydi u.
Shu bilan birga Ellsberg ta’kidlashicha, yetakchi harbiy davlatlar zarur bo‘lgan darajadan ko‘ra, ancha qaqshatqichroq potensialga ega. Uning so‘zlariga ko‘ra, bir necha kun ichida to‘liq ko‘lamli yadroli nizo millionlab odamlarni yo‘q qiladi va insoniyat halokatiga olib keladi.
Amerika rahbariyatining ommaviy qirg‘in quroliga nisbatan munosabati ham ekspertda xavotir uyg‘otadi. “Biz urushda go‘yoki ommaviy qirg‘in quroli, yondiruvchi va atom bombalar sharofati bilan g‘alaba qozonganiga ishonadigan dunyodagi yagona mamlakatmiz”, — deb yozadi Ellsberg AQSh haqida. “Biz bularning barchasi o‘rinli bo‘lganligiga ishonadigan yagona kishilarmiz. Qurolga nisbatan bunday munosabat juda xavfli”, — degan fikrda u.
Kitob oxirida Ellsberg umumdunyo nizosi oldini olish bo‘yicha bir nechta tavsiyalar bergan: AQSh urush boshlamasligi va birinchi bo‘lib yadro qurolini qo‘llamasligi kerak, u, shuningdek, “yadroviy uchlik”ning yer usti komponentini ham yo‘q qilishi kerak.
Izoh (0)