Bu masala bo‘yicha ovoz berishlar va muhokamalar natijalaridan qat’i nazar, Quddus Isroil poytaxti bo‘ladi. Bu haqda yahudiy davlatining BMTdagi doimiy vakili Danni Danon aytib o‘tdi, deb yozadi “TASS”. U buni AQSh prezidenti Donald Trampning Quddusni Isroil poytaxti deb tan olish qaroriga javoban, Xavfsizlik kengashida bunga qarshi rezolyutsiya loyihasi muhokama qilinishini izohlayotib ma’lum qildi.
“Hech qanday ovoz berish Quddus doim Isroilning poytaxti bo‘lgani va shunday bo‘lib qolishidan iborat aniq-ravshan voqelikni o‘zgartirmaydi. Ittifoqdoshlarimiz bilan birgalikda biz tarixiy adolat uchun kurashni davom ettiramiz”, — deyiladi diplomatning yozma bayonotida.
U rezolyutsiya loyihasi eramizdan avvalgi II asrda Quddusning ozod etilgani xotirasiga o‘tkaziladigan yahudiylar bayrami — Xanukani nishonlash davrida ko‘rib chiqilayotgani yuzasidan norozilik bildirdi hamda falastinliklarni “tarixni qayta yozishda” aybladi.
Arab mamlakatlari 18-dekabr, dushanba kungi ovoz berishda o‘z rezolyutsiyasi loyihasini kiritmoqchi. Hujjat Falastin-Isroil munosabatlarini tartibga solishning mavjud tamoyillarini mustahkamlashga qaratilgan, unga muvofiq, Quddusning maqomi tomonlar o‘rtasidagi to‘g‘ridan-to‘g‘ri muzokaralar chog‘ida belgilanishi kerak.
Izoh (0)