АҚШ ядро стратегияси ишлаб чиқувчиси инсоният қандай ҳалок бўлиши ҳақида гапириб берди

Америкалик ҳарбий таҳлилчи Даниэль Эллсберг ўзининг «Қиёмат куни машинаси: ядровий стратегнинг тавбаси» деб номланган янги китобида Учинчи жаҳон урушининг эҳтимолий сабаблари ва унинг оқибатлари ҳақида гапириб берди, деб ёзади «РИА Новости».

Катта кўламли низони электроникадаги носозлик, ОАВдаги ёлғон хабар ёки бемулоҳаза буйруқ келтириб чиқариши мумкин. Масалан, Вашингтон ёки Москвадаги теракт ҳақидаги сохта янгилик ядроли адоват учун етарлича асос бўла олади, деб ҳисоблайди у.

Шу билан бирга Эллсберг таъкидлашича, етакчи ҳарбий давлатлар зарур бўлган даражадан кўра, анча қақшатқичроқ потенциалга эга. Унинг сўзларига кўра, бир неча кун ичида тўлиқ кўламли ядроли низо миллионлаб одамларни йўқ қилади ва инсоният ҳалокатига олиб келади.

Америка раҳбариятининг оммавий қирғин қуролига нисбатан муносабати ҳам экспертда хавотир уйғотади. «Биз урушда гўёки оммавий қирғин қуроли, ёндирувчи ва атом бомбалар шарофати билан ғалаба қозонганига ишонадиган дунёдаги ягона мамлакатмиз», — деб ёзади Эллсберг АҚШ ҳақида. «Биз буларнинг барчаси ўринли бўлганлигига ишонадиган ягона кишилармиз. Қуролга нисбатан бундай муносабат жуда хавфли», — деган фикрда у.

Китоб охирида Эллсберг умумдунё низоси олдини олиш бўйича бир нечта тавсиялар берган: АҚШ уруш бошламаслиги ва биринчи бўлиб ядро қуролини қўлламаслиги керак, у, шунингдек, «ядровий учлик»нинг ер усти компонентини ҳам йўқ қилиши керак.