Xorazm viloyat davlat soliq boshqarmasi tashabbusi bilan Qo‘shko‘pir va Xiva tumanlarida bo‘sh ish o‘rinlari yarmarkalari tashkil etildi. Bu haqda “Daryo”ga boshqarma matbuot xizmati ma’lum qildi.
Yarmarkalarda Qo‘shko‘pir, Xiva tumanlari va Xiva shahrida faoliyat yuritib kelayotgan 165 korxona va tashkilot 500 dan ortiq bo‘sh ish o‘rinlari bilan qatnashdi.
“Bundan 4 yil avval Xiva tuman tibbiyot kollejini tugatganman. Bugungi kunga qadar bir necha joyga ish so‘rab murojaat qildim, lekin amaliy natijaga erisholmadim. Mazkur yarmarkada tumandagi 40-sonli maktabga hamshira bo‘lib ishga joylashdim. Bu kabi tadbirlar biz yoshlarga katta ko‘mak berishiga ishonch hosil qildim”, — deydi qo‘shko‘pirlik Iboda Qutliyeva.
“Bo‘sh ish o‘rinlari yarmarkalarining tashkil etilishi chindan ham qishloq yoshlariga amaliy yordam bermoqda. Bundan tashqari, bizga biriktirilgan jami 100 ta mahallada uyma-uy yurib, eng quyi bo‘g‘in – qishloqlardagi dolzarb muammolarni aniqlash, ularni joyida bartaraf etish, tuman va viloyat miqyosida hal qilinishi kerak bo‘lgan masalalar yuzasidan takliflar tayyorlashga erishilmoqda. Natijada jinoyatchilik va huquqbuzarliklarning oldini olish, ishsiz fuqarolarni ish bilan ta’minlash, qish-bahor mavsumi uchun oziq-ovqat mahsulotlarini zaxira qilish, aholini suyultirilgan gaz ballonlari va ko‘mir bilan ta’minlash masalalari bevosita mahallalarning o‘zida hal etilishi ta’minlanmoqda”, — ta’kidladi viloyat davlat soliq boshqarmasi boshlig‘i Jahongir Temurov.
Yarmarkalarda ishtirokchilardan 63 nafariga ishga yo‘llanma berildi, 40 nafari kasbga o‘qitish kurslariga jalb qilindi. 300 nafarga yaqin kollej bitiruvchisi o‘z mutaxassisligi bo‘yicha kerakli tavsiyalar oldi.
Izoh (0)