Vazirlar Mahkamasining 1-noyabrdagi qaroriga asosan Madaniyat va san’atni rivojlantirish jamg‘armasining nizomi, jamg‘arma Kengashining tarkibi hamda ijrochi direksiyasining tuzilmasi tasdiqlandi. Bu haqda Norma xabar berdi.
Nizom bilan Jamg‘armaning maqomi, asosiy vazifalari, funksiyalari, faoliyatini tashkil etish, uning mablag‘larini shakllantirish va sarflash tartibiga aniqlik kiritildi.
Jamg‘armaning funksiyalari quyidagilardan iborat:
- madaniy, xususan xalqaro tadbirlarni tashkil etish va o‘tkazish;
- O‘zbekiston madaniyati va san’atini rivojlantirishga grantlarni va sarmoyalarni jalb etish maqsadida xalqaro hamkorlar va tashkilotlar bilan hamkorlik qilish;
- Madaniyat vazirligi tizimidagi muassasalarning iqtidorli o‘quvchi va talabalarini moddiy rag‘batlantirish bo‘yicha tadbirlarni moliyalashtirish;
- Madaniyat vazirligi tizimidagi muassasalarning madaniyat va san’at sohasidagi kadrlarini tayyorlash, qayta tayyorlash va ularning malakasini oshirish tizimini takomillashtirish;yangi madaniyat muassasalarining qurilishida ko‘maklashish;
- “O‘zbekkonsert” davlat muassasasining hisobraqamiga mablag‘larning doimiy o‘tkazilishini ta’minlash va boshqalar.
Jamg‘arma huzurida madaniyat va san’at arboblaridan tashkil topgan Vasiylik kengashi va Ekspert kengash tashkil etilishi mumkin.
Jamg‘arma mablag‘larini shakllantirish va sarflash tartibiga o‘zgartirish kiritildi. Shu tariqa, mablag‘larni shakllantirish manbalari etib quyidagilar belgilandi:
- konsert-tomosha faoliyatini amalga oshirish huquqini beruvchi litsenziyalarni berish uchun olinadigan davlat boji uchun tushgan summalarning 70 foizi miqdorida;
- Vazirlar Mahkamasi tomonidan belgilangan miqdorda davlat foydasiga undirilgan mulkning sotilishidan davlat byudjetiga kelib tushgan mablag‘larning bir qismi;
- “O‘zvinosanoat-xolding” AJ tomonidan o‘zining shaxsiy tashabbusi tartibida har yili ajratiladigan mablag‘lar;
- Jamg‘armaning vaqtinchalik bo‘sh mablag‘larini moliya tashkilotlariga joylashtirishdan olinadigan daromadlar;
- yuridik va jismoniy shaxslar, xalqaro tashkilotlarning xayriya ehsonlari, grantlari;
- qonun hujjatlarida taqiqlanmagan boshqa manbalar.
- 75 foizdan kam bo‘lmagan mablag‘ — Jamg‘armaning asosiy vazifalarini amalga oshirish doirasidagi tadbirlarni amalga oshirish uchun;
- 25 foizdan ko‘p bo‘lmagan mablag‘ — Madaniyat vazirligi hamda uning idoraviy mansub tashkilotlari xodimlarini moddiy rag‘batlantirish va ijtimoiy muhofazasi uchun.
Izoh (0)