Вазирлар Маҳкамасининг 1 ноябрдаги қарорига асосан Маданият ва санъатни ривожлантириш жамғармасининг низоми, жамғарма Кенгашининг таркиби ҳамда ижрочи дирексиясининг тузилмаси тасдиқланди. Бу ҳақда Norma хабар берди.
Низом билан Жамғарманинг мақоми, асосий вазифалари, функциялари, фаолиятини ташкил этиш, унинг маблағларини шакллантириш ва сарфлаш тартибига аниқлик киритилди.
Жамғарманинг функциялари қуйидагилардан иборат:
- маданий, хусусан халқаро тадбирларни ташкил этиш ва ўтказиш;
- Ўзбекистон маданияти ва санъатини ривожлантиришга грантларни ва сармояларни жалб этиш мақсадида халқаро ҳамкорлар ва ташкилотлар билан ҳамкорлик қилиш;
- Маданият вазирлиги тизимидаги муассасаларнинг иқтидорли ўқувчи ва талабаларини моддий рағбатлантириш бўйича тадбирларни молиялаштириш;
- Маданият вазирлиги тизимидаги муассасаларнинг маданият ва санъат соҳасидаги кадрларини тайёрлаш, қайта тайёрлаш ва уларнинг малакасини ошириш тизимини такомиллаштириш;янги маданият муассасаларининг қурилишида кўмаклашиш;
- «Ўзбекконцерт» давлат муассасасининг ҳисобрақамига маблағларнинг доимий ўтказилишини таъминлаш ва бошқалар.
Жамғарма ҳузурида маданият ва санъат арбобларидан ташкил топган Васийлик кенгаши ва Эксперт кенгаш ташкил этилиши мумкин.
Жамғарма маблағларини шакллантириш ва сарфлаш тартибига ўзгартириш киритилди. Шу тариқа, маблағларни шакллантириш манбалари этиб қуйидагилар белгиланди:
- концерт-томоша фаолиятини амалга ошириш ҳуқуқини берувчи лицензияларни бериш учун олинадиган давлат божи учун тушган суммаларнинг 70 фоизи миқдорида;
- Вазирлар Маҳкамаси томонидан белгиланган миқдорда давлат фойдасига ундирилган мулкнинг сотилишидан давлат бюджетига келиб тушган маблағларнинг бир қисми;
- «Ўзвиносаноат-холдинг» АЖ томонидан ўзининг шахсий ташаббуси тартибида ҳар йили ажратиладиган маблағлар;
- Жамғарманинг вақтинчалик бўш маблағларини молия ташкилотларига жойлаштиришдан олинадиган даромадлар;
- юридик ва жисмоний шахслар, халқаро ташкилотларнинг хайрия эҳсонлари, грантлари;
- қонун ҳужжатларида тақиқланмаган бошқа манбалар.
- 75 фоиздан кам бўлмаган маблағ — Жамғарманинг асосий вазифаларини амалга ошириш доирасидаги тадбирларни амалга ошириш учун;
- 25 фоиздан кўп бўлмаган маблағ — Маданият вазирлиги ҳамда унинг идоравий мансуб ташкилотлари ходимларини моддий рағбатлантириш ва ижтимоий муҳофазаси учун.
Изоҳ (0)