Turkiyada turizmni rivojlantirish bo‘yicha ko‘p yillik tajribaga ega Sodiq Badak O‘zbekiston Turizmni rivojlantirish davlat qo‘mitasi raisi maslahatchisi etib tayinlanadi. “Gazeta.uz”ning davlat qo‘mitasi matbuot xizmatiga asoslanib xabar berishicha, Badak noyabr oyidan ishga kirishadi.
Turkiya Milliy assambleyasining sobiq deputati nomzodi O‘zbekiston Prezidenti Shavkat Mirziyoyevning 25—26-oktyabr kunlari Turkiyaga amalga oshirgan tashrifi davomida Turkiyaning Antaliya viloyati tomonidan turk hukumatiga tavsiya etilgan edi.
Maslahatchi zimmasiga quyidagi vazifalar yuklatilgan:
- Turkiyaning turizmni rivojlantirish bo‘yicha 30 yillik tajribasini o‘zbek mutaxassislariga yetkazish hamda o‘rta va uzoq istiqbolda (5 va 10 yil) O‘zbekistonning turizm salohiyatini rivojlantirish bo‘yicha strategik rejani ishlab chiqishda ko‘maklashish;
- mamlakatning turistik salohiyati yuqori viloyatlarida infratuzilmalarni rivojlantirish loyihalari rejalarini ishlab chiqishda ko‘maklashish;
- O‘zbekistonning turizm sohasidagi qonunchiligini takomillashtirish bo‘yicha takliflar hamda turizmni jadal rivojlantirish yuzasidan qo‘shimcha rag‘batlantiruvchi choralarni ishlab chiqish;
- O‘zbekiston uchun potensial xorijiy turizm bozorlarini o‘rganib, turistik brendlarni rivojlantirish bo‘yicha takliflarni tayyorlash;
- chet ellik va mahalliy sayyohlar uchun yangi sayyohlik mahsulotlari va yo‘nalishlarini ishlab chiqish va hokazo.
Izoh (0)