Туркияда туризмни ривожлантириш бўйича кўп йиллик тажрибага эга Содиқ Бадак Ўзбекистон Туризмни ривожлантириш давлат қўмитаси раиси маслаҳатчиси этиб тайинланади. «Газета.uz»нинг давлат қўмитаси матбуот хизматига асосланиб хабар беришича, Бадак ноябрь ойидан ишга киришади.
Туркия Миллий ассамблеясининг собиқ депутати номзоди Ўзбекистон Президенти Шавкат Мирзиёевнинг 25—26-октябр кунлари Туркияга амалга оширган ташрифи давомида Туркиянинг Анталия вилояти томонидан турк ҳукуматига тавсия этилган эди.
Маслаҳатчи зиммасига қуйидаги вазифалар юклатилган:
- Туркиянинг туризмни ривожлантириш бўйича 30 йиллик тажрибасини ўзбек мутахассисларига етказиш ҳамда ўрта ва узоқ истиқболда (5 ва 10 йил) Ўзбекистоннинг туризм салоҳиятини ривожлантириш бўйича стратегик режани ишлаб чиқишда кўмаклашиш;
- мамлакатнинг туристик салоҳияти юқори вилоятларида инфратузилмаларни ривожлантириш лойиҳалари режаларини ишлаб чиқишда кўмаклашиш;
- Ўзбекистоннинг туризм соҳасидаги қонунчилигини такомиллаштириш бўйича таклифлар ҳамда туризмни жадал ривожлантириш юзасидан қўшимча рағбатлантирувчи чораларни ишлаб чиқиш;
- Ўзбекистон учун потенциал хорижий туризм бозорларини ўрганиб, туристик брендларни ривожлантириш бўйича таклифларни тайёрлаш;
- чет эллик ва маҳаллий сайёҳлар учун янги сайёҳлик маҳсулотлари ва йўналишларини ишлаб чиқиш ва ҳоказо.
Изоҳ (0)