Oktabr oyi boshida Nigerda o‘qqa tutilgan Amerikaning maxsus topshiriqli bo‘linmasi guruhiga havo orqali yordam berishdan bosh tortishgan. The Wall Street Journal’ning yozishicha, aynan shu vaziyat to‘rt kishining o‘limiga olib kelgan bo‘lishi mumkin, deb xabar berdi “TASS”.
Nashrning o‘z manbalariga tayanib ma’lum qilishicha, maxsus topshiriqli bo‘linma Pentagonning rasmiy bayonotida keltirilganidan ko‘ra ancha yirik va xavfli operatsiyada ishtirok etgan. Bu kabi harakatlarga hech bo‘lmaganda bitta razvedka uchun mo‘ljallangan uchuvchisiz uchish qurilmasi hamrohlik qilishi kerak. Uni belgilangan kvadratga jo‘natish haqidagi so‘rov o‘z vaqtida yuborilgan, biroq u bu kabi murojaatlarni o‘rganish va ma’qullash bilan shug‘ullanuvchi ko‘plab instansiyalarda ushlanib qolgan.
AQSh Qurolli kuchlari shtab boshliqlari qo‘mitasi raisi general Jozef Danfordning so‘zlariga ko‘ra, 3-oktabr kuni Amerika otryadlari Niger armiyasining axborot to‘plash borasidagi razvedka topshirig‘ini bajarayotgan bo‘linmasiga hamrohlik qilgan. Amerika qo‘mondonligining o‘sha vaqtdagi mavjud ma’lumotlariga ko‘ra, dushmanga to‘qnash kelish ehtimolli juda kam bo‘lgan. 4-oktabr tongida patrul bazaga qaytayotganida o‘qqa tutilgan. Maxsus topshiriqli bo‘linma ixtiyorida faqatgina pulemyot va yengil o‘qotar qurollar bo‘lgan.
Generalning qayd etishicha, AQSh hamda Niger harbiylari otishma boshlanganidan bir soat o‘tgachgina yordam so‘ragan. 30 daqiqadan so‘ng havoga fransuz qiruvchi samolyotlari ko‘tarilgan va ular oradan yarim soat o‘tgach manzilga yetib borgan. Noxush hodisa oqibatida Amerika maxsus topshiriqli bo‘linmasining to‘rt a’zosi halok bo‘lgan.
Pentagon ushbu holat yuzasidan tergov olib bormoqda.
Izoh (0)