Kanada hukumati o‘zining Iroqdagi harbiy instruktorlari ishini vaqtinchalik to‘xtatish haqida qaror qabul qildi. Bu haqda CBC telekanaliga tayanib “TASS” xabar berdi.
Telekanalning ushbu axborotini Kanada Milliy mudofaa vazirligidagi manba tasdiqlagan. Uning ma’lumotlariga ko‘ra, kanadaliklar “Iroq qurolli tuzilmalarining turli elementlarini va ularning ta’minotini qo‘llab-quvvatlashni” hozircha to‘xtatadi. Boshqa tafsilotlar keltirilmagan.
25-sentabr kuni Iroq Kurdistonida mustaqillik referendumi bo‘lib o‘tgan edi. Bag‘dod hukumati ushbu referendum konstitutsiyaga zid ravishda o‘tganini va ovoz berish natijalarini tan olmasligini ma’lum qilgan.
Referendumdan so‘ng Iroqning shimoliy neft poytaxti — Kirkukda vaziyat birdan keskinlashdi. U yerni “peshmerga” kurd harbiy otryadlari nazorat qiladi, biroq ular Iroq Kurdistoni (Kurd avtonom viloyatining norasmiy nomi) tarkibiga kirmaydi. Kirkuk uning tarkibida bo‘lmay turib, bir tomonlama tartibda avtonom viloyatning mustaqilligiga qo‘shilganini e’lon qildi.
16-oktabr kuni Iroq bosh vaziri Haydar al-Obodiy hukumat kuchlariga viloyatda xavfsizlik va barqarorlikni qayta ta’minlash borasida topshiriq berdi. Keyinroq, Al Sumaria telekanalining xabar qilishicha, Kirkuk janubida “peshmerga” otryadlari va hukumat kuchlari o‘rtasida to‘qnashuv qayd etilgan.
Izoh (0)