Канада ҳукумати ўзининг Ироқдаги ҳарбий инструкторлари ишини вақтинчалик тўхтатиш ҳақида қарор қабул қилди. Бу ҳақда CBC телеканалига таяниб «ТАСС» хабар берди.
Телеканалнинг ушбу ахборотини Канада Миллий мудофаа вазирлигидаги манба тасдиқлаган. Унинг маълумотларига кўра, канадаликлар «Ироқ қуролли тузилмаларининг турли элементларини ва уларнинг таъминотини қўллаб-қувватлашни» ҳозирча тўхтатади. Бошқа тафсилотлар келтирилмаган.
25 сентябрь куни Ироқ Курдистонида мустақиллик референдуми бўлиб ўтган эди. Бағдод ҳукумати ушбу референдум конституцияга зид равишда ўтганини ва овоз бериш натижаларини тан олмаслигини маълум қилган.
Референдумдан сўнг Ироқнинг шимолий нефть пойтахти — Киркукда вазият бирдан кескинлашди. У ерни «пешмерга» курд ҳарбий отрядлари назорат қилади, бироқ улар Ироқ Курдистони (Курд автоном вилоятининг норасмий номи) таркибига кирмайди. Киркук унинг таркибида бўлмай туриб, бир томонлама тартибда автоном вилоятнинг мустақиллигига қўшилганини эълон қилди.
16 октябрь куни Ироқ бош вазири Ҳайдар ал-Ободий ҳукумат кучларига вилоятда хавфсизлик ва барқарорликни қайта таъминлаш борасида топшириқ берди. Кейинроқ, Al Sumaria телеканалининг хабар қилишича, Киркук жанубида «пешмерга» отрядлари ва ҳукумат кучлари ўртасида тўқнашув қайд этилган.
Изоҳ (0)