Xitoyda mamlakat yetakchisi olqishlanadigan onlayn o‘yin ishga tushirildi

Xitoyning Tencent telekommunikatsion kompaniyasi 18-oktabrda Clap for Xi Jinping (“Si Szinpinga olqishlar”) nomli o‘yinni ishga tushirdi. Foydalanuvchilar o‘yinda mamlakat raisi Si Szinpinni olqishlashi kerak. O‘yinning ishga tushirilishi Xitoy kommunistik partiyasining XIX syezdi ochilish kunida tashkil qilindi. Bu haqda TJournal xabar berdi.

Clap for Xi Jinping o‘yinida Szinpinning uch yarim soatlik nutqidan olingan parchalardan foydalanilgan. Mazkur nutqda XXR raisi zamonaviy sotsializm haqida gapirib, Xitoyni 2050-yilgacha “dunyo yetakchisi” qiladigan 14 ta prinsipni tushuntirib bergan.

Dastlab o‘yinchiga davlat rahbarining nutqidan parcha ko‘rsatiladi va olqishlash uchun 18 soniya beriladi. Bu vaqt ichida iloji boricha ko‘proq qarsak chalish kerak. Bunda o‘yinchiga kommunistik partiyaning majlislar zali fonida virtual kaft ko‘rsatiladi.

Tencent Holdings Xitoyning yirik kompaniyalaridan biri bo‘lib, u tomonidan yaratilgan WeChat messenjeridan qariyb 900 million kishi foydalanadi. Clap for Xi Jinping o‘yinining reklamasi mobil dasturlarda ham paydo bo‘lgan, shuningdek, o‘yin haqida OAV va telekanallarda hikoya qilingan.

Ma’lumotlarga ko‘ra, bir sutkada o‘yin taxminan 800 million marta o‘ynab ko‘rilgan. What's on Weibo blogining ma’lumotlariga ko‘ra, Pekin vaqti bilan soat 21:00 ga borib o‘yin 400 million marta o‘ynalgan. WeChat’ning ba’zi foydalanuvchilari 18 soniyada 1600 ta qarsak to‘plashga muvaffaq bo‘lgan.