Хитойда мамлакат етакчиси олқишланадиган онлайн ўйин ишга туширилди

Хитойнинг Tencent телекоммуникацион компанияси 18 октябрда Clap for Xi Jinping («Си Цзиньпинга олқишлар») номли ўйинни ишга туширди. Фойдаланувчилар ўйинда мамлакат раиси Си Цзиньпинни олқишлаши керак. Ўйиннинг ишга туширилиши Хитой коммунистик партиясининг XIX съезди очилиш кунида ташкил қилинди. Бу ҳақда TJournal хабар берди.

Clap for Xi Jinping ўйинида Сзинпиннинг уч ярим соатлик нутқидан олинган парчалардан фойдаланилган. Мазкур нутқда ХХР раиси замонавий социализм ҳақида гапириб, Хитойни 2050 йилгача «дунё етакчиси» қиладиган 14 та принципни тушунтириб берган.

Дастлаб ўйинчига давлат раҳбарининг нутқидан парча кўрсатилади ва олқишлаш учун 18 сония берилади. Бу вақт ичида иложи борича кўпроқ қарсак чалиш керак. Бунда ўйинчига коммунистик партиянинг мажлислар зали фонида виртуал кафт кўрсатилади.

Tencent Holdings Хитойнинг йирик компанияларидан бири бўлиб, у томонидан яратилган WeChat мессенжеридан қарийб 900 миллион киши фойдаланади. Clap for Xi Jinping ўйинининг рекламаси мобил дастурларда ҳам пайдо бўлган, шунингдек, ўйин ҳақида ОАВ ва телеканалларда ҳикоя қилинган.

Маълумотларга кўра, бир суткада ўйин тахминан 800 миллион марта ўйнаб кўрилган. What's on Weibo блогининг маълумотларига кўра, Пекин вақти билан соат 21:00 га бориб ўйин 400 миллион марта ўйналган. WeChat’нинг баъзи фойдаланувчилари 18 сонияда 1600 та қарсак тўплашга муваффақ бўлган.