Toshkent shahar IIBB Yo‘l harakati xavfsizligi bosh boshqarmasi shahar chorrahalariga o‘rnatilgan va yo‘l harakati qoidabuzarliklarini aniqlovchi kameralar ishlamay qolgani haqidagi mish-mishlarni rad etdi. Bu haqda “1news.uz” xabar bermoqda.
IIBB vakilining ma’lum qilishicha, shahar chorrahalaridagi kameralar odatdagi tartibda ishlamoqda va qoidabuzar haydovchilarni aniqlamoqda; tizim ishga tushgan 15-martdan beri hech qanday nosozlik holatlari yuz bermagan.
“Agar statistikaga murojaat qiladigan bo‘lsak, o‘tgan davr mobaynida 115 chorrahaga o‘rnatilgan kameralar 215 915 ta qoidabuzarlikni aniqlagan. Ulardan 100 462 tasini tezlikni belgilangan me’yordan oshirish, 115 453 tasini esa svetoforning qizil chirog‘ida harakatlanish tashkil etadi”, — deydi IIBB vakili.
Uning qo‘shimcha qilishicha, birgina 21—27-sentabr kunlari oralig‘ida kameralar yordamida 3 370 ta qoidabuzarlik aniqlangan bo‘lib, ularning 2065 tasi tezlikni oshirish, 1 305 tasi esa svetoforning taqiqlovchi ishorasiga bo‘ysunmaslik tashkil etadi.
Avvalroq o‘zbekistonlik avtohavaskorlarning ijtimoiy tarmoqlardagi guruhlarida yo‘llardagi kameralar ishlamay qolgani, qoidabuzarlik amalga oshirilsa ham, haydovchilarga jarima qog‘ozlari kelmayotgani haqida xabarlar paydo bo‘lgan edi. Ayni vaqtda, ular bu so‘zlariga biror bir dalil keltirmagan edi.
Qayd etish joiz, yaqin kelajakda Toshkentning yana 280 ta chorrahasiga yo‘l harakati qoidabuzarliklarini qayd etish kameralari o‘rnatilishi kutilmoqda.
Izoh (0)