Тошкент шаҳар ИИББ Йўл ҳаракати хавфсизлиги бош бошқармаси шаҳар чорраҳаларига ўрнатилган ва йўл ҳаракати қоидабузарликларини аниқловчи камералар ишламай қолгани ҳақидаги миш-мишларни рад этди. Бу ҳақда «1news.uz» хабар бермоқда.
ИИББ вакилининг маълум қилишича, шаҳар чорраҳаларидаги камералар одатдаги тартибда ишламоқда ва қоидабузар ҳайдовчиларни аниқламоқда; тизим ишга тушган 15 мартдан бери ҳеч қандай носозлик ҳолатлари юз бермаган.
«Агар статистикага мурожаат қиладиган бўлсак, ўтган давр мобайнида 115 чорраҳага ўрнатилган камералар 215 915 та қоидабузарликни аниқлаган. Улардан 100 462 тасини тезликни белгиланган меъёрдан ошириш, 115 453 тасини эса светофорнинг қизил чироғида ҳаракатланиш ташкил этади», — дейди ИИББ вакили.
Унинг қўшимча қилишича, биргина 21—27 сентябрь кунлари оралиғида камералар ёрдамида 3 370 та қоидабузарлик аниқланган бўлиб, уларнинг 2065 таси тезликни ошириш, 1 305 таси эса светофорнинг тақиқловчи ишорасига бўйсунмаслик ташкил этади.
Аввалроқ ўзбекистонлик автоҳаваскорларнинг ижтимоий тармоқлардаги гуруҳларида йўллардаги камералар ишламай қолгани, қоидабузарлик амалга оширилса ҳам, ҳайдовчиларга жарима қоғозлари келмаётгани ҳақида хабарлар пайдо бўлган эди. Айни вақтда, улар бу сўзларига бирор бир далил келтирмаган эди.
Қайд этиш жоиз, яқин келажакда Тошкентнинг яна 280 та чорраҳасига йўл ҳаракати қоидабузарликларини қайд этиш камералари ўрнатилиши кутилмоқда.
Изоҳ (0)