Kim Chen In KXDR harbiylari Janubiy Koreya orollarini “egallashi”ni tomosha qilish uchun poligonga keldi

KXDR yetakchisi Kim Chen In maxsus topshiriqli bo‘linmaning Janubiy Koreyadagi Pennyondo va Yonpxyondo orollarini qo‘lga olish harakatlari borasida poligonda o‘tkazgan o‘quv mashg‘ulotiga tashrif buyurdi. Bu haqda KCNA agentligiga tayanib, “TASS” xabar berdi.

KXDR armiyasining maxsus topshiriqli bo‘linmasi ssenariy bo‘yicha Pennyondo va Yonpxyondo sifatida qaralgan ikkita orolga hujum uyushtirdi. Avvaliga hujum jangovar samolyotlar, so‘ng reaktiv qurollar va o‘ziyurar gaubitsalar yordamida amalga oshirildi. Shundan so‘ng desantlar orolni nazorat ostiga oldi: maxsus kuchlar parashyutlar yordamida yerga tushdi, “suv orqali maxfiy ravishda orolga kirib bordi”, shuningdek, rezina qayiqlar orqali bostirib keldi.

Kim Chen In natijalardan qoniqqan hamda askar va ofitserlarning jangovar ruhiyatiga yuqori baho bergan. “Armiya dushmanlarni qurol yordamida yo‘q qilishni, shuningdek, Seul va Koreyaning janubiy qismini bitta urinishda qo‘lga kiritishni o‘ylashi kerak”, — deya ta’kidladi mamlakat yetakchisi.