Termiz shahrida barcha qulayliklarga ega “Nuroniylar maskani” majmuasi foydalanishga topshirildi. Shu munosabat bilan o‘tkazilgan tadbirda davlat va jamoat tashkilotlari rahbarlari, nuroniy otaxon va onaxonlar, viloyatda faoliyat yuritayotgan milliy madaniyat markazlari vakillari, yoshlar ishtirok etdi. Bu haqda O‘zA xabar berdi.
Mustaqillik yillarida mamlakatda keksa avlod vakillarini e’zozlash, ularga yuksak hurmat-ehtirom ko‘rsatish, munosib turmush kechirishi, dam olishi, jamiyatda faol bo‘lishi uchun barcha sharoit yaratib berilayotgani alohida ta’kidlandi.
O‘zbekiston Prezidentning 2016-yil 28-dekabrdagi “O‘zbekiston faxriylarni ijtimoiy qo‘llab-quvvatlash “Nuroniy” jamg‘armasi faoliyatini yanada takomillashtirish chora-tadbirlari to‘g‘risida”gi farmoni ijrosi doirasida barpo etilgan muhtasham binoni kapital ta’mirlash, zamonaviy usulda jihozlash uchun bir milliard so‘mdan ortiq mablag‘ sarflandi.
Kutubxona, nuroniylar choyxonasi, mehmonxona, sport-sog‘lomlashtirish majmuasi, ma’naviyat, tibbiyot xonalari keksa avlod vakillari miriqib dam oladigan, madaniy hordiq chiqaradigan maskanga aylantirildi.
Nuroniylarga davlat rahbari nomidan King Long rusumli avtobus sovg‘a qilindi.
Izoh (0)