O‘zbekiston Respublikasi hududiga jismoniy shaxslar tomonidan tovarlarni aksiz solig‘i solinmasdan olib kirishning ruxsat etilgan me’yorlariga muvofiq umumiy og‘irligi 30 grammdan ortiq bo‘lmagan qimmatbaho toshlar va qimmatbaho metalldan tayyorlangan 5 donagacha zargarlik buyumlarini olib kirishga ruxsat etiladi, deb xabar berdi “Toshkent-Aero” IBK axborot xizmati.
Shunga qaramay Islom Karimov nomidagi Toshkent xalqaro aeroportida Istanbuldan uchib kelgan fuqaro X. Burxonova mazkur tartiblarni buzishga urindi. U yo‘lovchi bojxona deklaratsiyasida va bojxona xodimlarining og‘zaki so‘rovi paytida ma’lum qilmasdan turib, qiymati dastlabki hisob-kitoblarga ko‘ra salkam 73 million so‘mni tashkil qiluvchi 364 gramm og‘irlikdagi tilla taqinchoqlarni bagajiga yashirgan holda olib kirishga uringan paytda to‘xtatib qolindi.
“Istanbul—Toshkent” reysining yana bir yo‘lovchisi N. Xalimova ham xolislar ishtirokida shaxsiy ko‘rikdan o‘tkazilganda, yo‘lovchi bojxona deklaratsiyasida va bojxona xodimlarining og‘zaki so‘rovi paytida ma’lum qilinmagan qiymati 10 million so‘mdan ortiq 104 gramm og‘irlikdagi tilladan ishlangan zargarlik buyumlarini cho‘ntagiga yashirgancha olib kirmoqchi bo‘lganligi fosh bo‘ldi.
Ma’lumki, respublikadan tilla va zargarlik buyumlarini eksport qilish faqatgina Vazirlar Mahkamasi ko‘satmasiga asosan Tashqi savdo vazirligi tomonidan beriladigan litsenziya asosida amalga oshiriladi.
Fuqarolar Sh. Ortiqov hamda Y. Abdurahmonovalar mazkur tartiblarga rioya qilmasdan yirik miqdordagi tilla quymalarni O‘zbekiston orqali noqonuniy olib chiqishga uringan.
“Toshkent—Dehli” reysi bo‘yicha parvoz oldidan ushbu shaxslarning bezovtalanishi bojxonachilarda bejizga shubha uyg‘otmagan. Odatdagidek, ularga tegishli bagajlar nazorat-rentgen apparatidan o‘tkazilganda, monitordagi tasvirlarning shubhali tus olishi bojxonachilarni jomadonlarni sinchiklab tekshirishga undadi.
Sh. Ortiqovga tegishli bagajda 485 gramm og‘irlikdagi 14 ta hamda Y. Abdurahmonovaning bagajida 607 gramm og‘irlikdagi 16 ta quyma tillalarning yashirin ravishda olib chiqilishi oldi olindi. Dastlabki hisob-kitoblarga ko‘ra, ushbu tillalarning taxminiy narxi salkam 100 million so‘mni tashkil qiladi.
Dehliga otlangan fuqarolar O. Mirzayeva va G. Mirzayeva ham ichki kiyimlari orasiga bekitgancha tilla quymalarni yashirin ravishda olib chiqayotgan paytda to‘xtatib qolindi. Shaxsiy ko‘rik davomida ma’lum bo‘lishicha, G. Mirzayeva qiymati salkam 18 million so‘mlik 197 gramm og‘irlikdagi va uning hamrohi O. Mirzayeva salkam 14 million so‘mlik 152 gramm og‘irlikdagi tillani quyma bo‘laklar shaklida olib chiqib ketishga uringan.
Hozirda mazkur holatlar yuzasidan bojxona tekshiruvlari va surishtiruv harakatlari davom ettirilmoqda.
Ta’kidlash joizki, “Toshkent-Aero” ixtisoslashtirilgan bojxona kompleksi xodimlari tomonidan huquqni muhofaza qiluvchi boshqa idoralar vakillari bilan hamkorlikda 2017-yilning birinchi yarmi davomida aniqlangan 53 ta bojxona qoidabuzarliklari natijasida qiymati salkam 658 million so‘mlik 10,6 kilogrammdan ortiq og‘irlikdagi tilla va zargarlik buyumlarining noqonuniy olib o‘tilishiga chek qo‘yilgan.
Izoh (0)