Термиз шаҳрида барча қулайликларга эга «Нуронийлар маскани» мажмуаси фойдаланишга топширилди. Шу муносабат билан ўтказилган тадбирда давлат ва жамоат ташкилотлари раҳбарлари, нуроний отахон ва онахонлар, вилоятда фаолият юритаётган миллий маданият марказлари вакиллари, ёшлар иштирок этди. Бу ҳақда ЎзА хабар берди.
Мустақиллик йилларида мамлакатда кекса авлод вакилларини эъзозлаш, уларга юксак ҳурмат-эҳтиром кўрсатиш, муносиб турмуш кечириши, дам олиши, жамиятда фаол бўлиши учун барча шароит яратиб берилаётгани алоҳида таъкидланди.
Ўзбекистон Президентнинг 2016 йил 28 декабрдаги «Ўзбекистон фахрийларни ижтимоий қўллаб-қувватлаш «Нуроний» жамғармаси фаолиятини янада такомиллаштириш чора-тадбирлари тўғрисида»ги фармони ижроси доирасида барпо этилган муҳташам бинони капитал таъмирлаш, замонавий усулда жиҳозлаш учун бир миллиард сўмдан ортиқ маблағ сарфланди.
Кутубхона, нуронийлар чойхонаси, меҳмонхона, спорт-соғломлаштириш мажмуаси, маънавият, тиббиёт хоналари кекса авлод вакиллари мириқиб дам оладиган, маданий ҳордиқ чиқарадиган масканга айлантирилди.
Нуронийларга давлат раҳбари номидан King Long русумли автобус совға қилинди.
Изоҳ (0)