Buxoro shahar IIBga Jondor tumanida yashovchi, 1955-yilda tug‘ilgan nafaqadagi R.Rajabova murojaat qilib, o‘zining Damas rusumli avtomashinasidan 1,5 million so‘m o‘g‘irlanganini bildirgan, deb xabar berdi Buxoro viloyati IIB matbuot xizmati.
Notanish ayol yo‘lovchi sifatida Damas’ga chiqqan va manzilga yetganida mashinadan tushayotib salonning old qismida qora xaltada turgan 1,5 million so‘m naqd pulni Rajabovaga sezdirmasdan o‘g‘irlab, voqea joyidan yashiringan.
Ichki ishlar idoralari xodimlari tomonidan olib borilgan tezkor surushtiruv tadbirlari davomida ushbu o‘g‘rilikni Buxoro tumani, A.Shokirov MFY, Urganjixona qishlog‘ida yashovchi, muqaddam sudlangan 1976-yilda tug‘ilgan Gulchehra To‘rayeva sodir qilganligi shu kunning o‘zida aniqlandi va undan 1,5 million so‘m pullar ashyoviy dalil sifatida hujjatlashtirib olindi.
Mazkur holat yuzasidan Gulchehra To‘rayevaga nisbatan O‘zbekiston Respublikasi Jinoyat Kodeksining 169-moddasi 1-qismi bilan jinoyat ishi qo‘zg‘atildi.
Izoh (0)