Toshkent viloyatida bir necha fuqarolarni aldab, moddiy manfaatdorlik evaziga ishlarini bitirib berishini aytib, firibgarlik qilgan shaxslar qo‘lga olindi. Bu haqda Toshkent viloyati IIB ma’lum qildi.
Angren shahrida joriy yilning 21-yanvaridan 14-mart kuniga qadar bo‘lgan vaqt oralig‘ida Namangan viloyatida yashovchi, vaqtincha ishsiz, 1979-yilda tug‘ilgan I.M. firibgarlik yo‘li bilan Bekobod shahrida yashovchi nafaqaxo‘r 1950-yilda tug‘ilgan G.I.ga Angren shahridagi xonadonlardan birini uning nomiga rasmiylashtirib berishni va’da qilgan. I.M. nafaqaxo‘rdan buning evaziga 2300 AQSh dollarini olib, shu kunga qadar qaytarib bermagan.
Shuningdek, 1960-yilda tug‘ilgan Q.E. firibgarlik yo‘li bilan 1981-yilda tug‘ilgan M.M.ni yuqoridagi kabi va’dalar bilan aldab, undan 1750 AQSh dollarini olib, o‘z ehtiyojlari uchun ishlatib yuborgan.
Yana bir holat 2017-yilning may oyida Bo‘ka tumanida yuz bergan. Olmaliq shahrida yashovchi uy bekasi 1985-yilda tug‘ilgan F.T. firibgarlik yo‘li bilan, 1972-yilda tug‘ilgan N.A.ni “uy olib beraman”, deb aldab, undan 22 300 000 so‘m olgan. F.T. qo‘lga kiritilgan pullarni o‘z ehtiyojiga ishlatib yuborgan.
Hozirda yuqoridagi jinoyatlarda gumonlanayotgan fuqarolarga nisbatan O‘zbekiston Respublikasi Jinoyat Kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Izoh (0)