12-iyul kuni Toshkent temir yo‘l transporti muhandislari institutining axborot-resurs markazi xodimi pora olish ustida qo‘lga tushdi. Bu haqda Toshkent shahar IIBB rasmiy sayti orqali ma’lum qilindi.
“12-iyul kuni soat 19:30 da Toshkent shahar IIBB xodimlari tomonidan Yakkasaroy tumanida o‘tkazilgan tezkor tadbir davomida Toshkent temir yo‘l transporti muhandislari instituti axborot-resurs markazi yetakchi mutaxassisi Hasanov Furqat Shukrulla o‘g‘li fuqaro Esonov Abdumalik Turg‘un o‘g‘lining ishonchiga kirib, unga oliygohning mansabdor shaxslariga pora berish yo‘li bilan mazkur institutga o‘qishga kiritib qo‘yishni va’da qilib, buning uchun undan 8 ming AQSh dollari miqdoridagi pullarni olgan vaqtida ashyoviy dalil bilan qo‘lga olindi”, — deyiladi xabarnomada.
Holat yuzasidan prokuratura idoralari tomonidan JKning 168-moddasi 2-qismi “a” bandi (firibgarlik, ya’ni ancha miqdorda, o‘zganing mulkini aldash va ishonchni suiiste’mol qilish yo‘li bilan qo‘lga kiritish) va 28, 211-moddasi 1-qismi (pora berishga dalolatchilik qilish) alomatlari bilan jinoyat ish qo‘zg‘atildi.
Hozirda dastlabki tergov harakatlari davom ettirilib, uning boshqa jinoyatlarga aloqadorligi tekshirilmoqda.
Izoh (0)