2017-yilning 6—12-iyul kunlari Buxoro viloyati hududida jami 59 ta jinoyat qayd etildi. Ushbu jinoyatlarning 50 tasi “issiq izi”dan fosh etilib, jinoyatlarning ochilishi 84,7 foizni tashkil qildi. Bu haqda Buxoro viloyati IIB matbuot xizmati “Daryo”ga xabar berdi.
Hafta davomida 1 ta qotillik, 1 ta bezorilik, 13 ta o‘g‘rilik, 9 ta firibgarlik, 4 ta tan jarohati yetkazish bilan bog‘liq hamda 31 tasi boshqa turdagi jinoyatlar sodir etilgan.
Jumladan, hafta davomida sodir etilgan qotillik jinoyati Qorako‘l tumani Osiyo MFYda yashovchi 1988-yilda tug‘ilgan M.Ro‘ziyevaga nisbatan sodir etildi.
Mazkur holat yuzasidan olib borilgan surishtiruv ishlari davomida er-xotin o‘rtasidagi o‘zaro kelishmovchilik sababli M.Ro‘ziyeva ikki nafar voyaga yetmagan farzandlarini olib otasining uyiga ketib qolganligi, turmush o‘rtog‘i S.Cho‘lliyev qaynotasining uyiga turmush o‘rtog‘ini qidirib borganligi va shu vaqtda turmush o‘rtogi M.Ro‘ziyeva bilan o‘zaro suhbatlasha turib tortishib qolganligi natijasida S.Cho‘lliyev tandirxonada bo‘lgan oshxona pichog‘i bilan M.Ro‘ziyevaning badaniga jarohat yetkazib uning o‘limiga sababchi bo‘lganligi aniqlangan.
Shuningdek, hafta davomida viloyat bo‘yicha 3 nafar qidiruvda yurgan jinoyatchilar ushlanib, jazoning muqarrarligi ta’minlangan bo‘lsa, Jondor tuman IIB xodimlari tomonidan 1 nafar bedarak yo‘qolgan shaxs aniqlanib, oila a’zolari qaramog‘iga topshirildi.
Izoh (0)