O‘zbekistonda “Mehnat faxriysi” ko‘krak nishoni ta’sis etildi

O‘zbekistonda “Mehnat faxriysi” ko‘krak nishonini ta’sis etildi. Bu haqdagi Prezident qarori 14-iyul kuni qabul qilindi. Hujjat matni O‘zAda keltirildi.

Ko‘krak nishoni bilan iqtisodiyot, ishlab chiqarish, ilm-fan, madaniyat, ta’lim, sog‘liqni saqlash, yurisprudensiya va boshqa sohalarda ko‘p yillar davomida halol va samarali mehnat qilgan nafaqa yoshidagi fuqarolar, shuningdek, ishlamasdan, hayotini oilalar mustahkamligini saqlash, farzandlarni jamiyat oldida mas’uliyat, milliy va umuminsoniy qadriyatlarga, kattalarga va yosh avlod vakillariga hurmat, ona Vatanga muhabbat, istiqlol g‘oyalariga sadoqat ruhida tarbiyalash ishlariga bag‘ishlab, jamiyatda hurmat qozongan onalar taqdirlanadi.

I darajali ko‘krak nishoni bilan kamida 35-yillik mehnat stajiga ega shaxslar;

II darajali ko‘krak nishoni bilan kamida 30-yillik mehnat stajiga ega shaxslar;

III darajali ko‘krak nishoni bilan kamida 25-yillik mehnat stajiga ega shaxslar, shuningdek, jamiyatda hurmat qozongan ishlamaydigan onalar taqdirlanadi.

I darajali ko‘krak nishoni yuqori darajali hisoblanadi. II yoki III darajali ko‘krak nishoni bilan taqdirlanganlar keyinchalik uning yuqori darajalari bilan bosqichma-bosqich mukofotlanishi mumkin. Bir darajadagi ko‘krak nishoni takroran berilmaydi.