O‘zbekiston—Qozog‘iston o‘rtasidagi chegara postlari yana o‘z ishini boshladi

Qozog‘iston va O‘zbekiston o‘rtasidagi chegara postlari yana ochildi. Bu haqda “Kazinform”ga tayanib, “1news.uz” xabar berdi.

Shuningdek, yana uchta bojxona punktlari kun-u tun ishlash rejimiga o‘tadi. Bu haqda Qozog‘iston va O‘zbekiston chegara bojxona organlari vakillarining o‘zaro uchrashuvida ma’lum qilindi.

Uchrashuv davomida Janubiy Qozog‘iston viloyatining Maqtaaral tumanidagi “Sirdaryo” hamda “Janadauir” nazorat punktlarini ochish masalasi, chegaradagi nazorat punktlarini kesib o‘tadigan tovar va transport vositalarini ro‘yxatga olish jarayonlarini tezlashtirish, ular orasidagi yo‘l va ko‘priklarni kengaytirish, “Kazigurt”, “Qoplonbek”, “Otamakon” nazorat punklarini tun-u kun ishlash rejimiga o‘tkazish, chegarani kesib o‘tayotgan jismoniy shaxslar uchun qulay sharoitlarni yaratish masalalari muhokama qilindi.

Muzokaralar natijasida bir qator masalalar bo‘yicha qarorlar qabul qilindi. Xususan, Maqtaaral tumanidagi 2008-yilda yopilgan “Sirdaryo” hamda “Janadauir” nazorat punktlari iyul oyidan o‘z ishini qayta davom ettiradigan bo‘ldi.

Bundan tashqari Qozog‘iston hududidagi postlar muntazam yangilanib turiladi va yangi texnologiyalarda ishlashga o‘tadi. Jumladan, transport vositalarining hujjatlarini ro‘yxatga olish jarayonlari tezlashtiriladi. Masalan, hozirda hujjatlarni ro‘yxatdan o‘tkazish uchun 38 daqiqa kerak bo‘lmoqda. Yangi texnologiyalar buni 25 daqiqaga bajarish imkonini beradi. Bu esa o‘z navbatida chegaradan o‘tadigan avtomobillar oqimini 400 tadan 1000 tagacha ortishiga olib keladi. Birgalikda ko‘rilgan chora-tadbirlar sharofatiga chegarani kuniga 40 ming nafar odam kesib o‘tishi mumkin bo‘ladi.