Prezident Shavkat Mirziyoyev 30-iyun kuni neft va gaz sanoatining boshqaruv tizimini rivojlantirish borasidagi qarorga imzo chekdi. Bu haqda “Prezident.uz” saytiga tayanib, “Gazeta.uz” xabar berdi.
Hujjatga ko‘ra, “O‘zbekneftgaz” MXK, “O‘zneftgazqazibolish” AK, “O‘ztransgaz” AK, “O‘zneftmahsulot” AK hamda “O‘zneftgazmash” nomlari aksiyadorlik jamiyati nomiga o‘zgartirildi. “O‘zgeoburneftgaz”ning nomi esa “O‘zburneftgaz” AJga o‘zgartirildi.
“O‘zbekneftgaz” tarkibida zamonaviy va sifatli geologiya-qidiruv ishlarini xizmat ko‘rsatish tashkilotlarini jalb qilgan holda amalga oshiruvchi, uglevodorod xomashyo zahirasining ortishini ta’minlash va yangi konlarini ochish, ularni qayta ishlash va tayyorlash uchun “O‘zneftgazqazibolish” tashkilotlariga taqdim etuvchi “O‘zneftgazgeologiya” MCHJ tashkil etiladi.
“O‘zneftgazqurilishinvest” aksiyadorlik kompaniyasining faoliyati to‘xtatildi. “O‘zgazinjiniring” MCHJ nomi “Neftgazqurilish” MCHJga o‘zgartirilib, uning zimmasiga “O‘zbekneftgaz” va uning aksiyadorlar jamiyati tarkibiga kiruvchi qurilish-montaj tashkilotlarining faoliyatini muvofiqlashtirish vazifasi qo‘yildi.
Bundan tashqari, “O‘zbekneftgaz” tarkibida “O‘zbekneftgaz” va uning aksiyadorlik jamiyatlari tarkibiga kiruvchi tashkilotlar tomonidan mahsulotlarini eksport qilishga ixtisoslashgan ”Neftgazeksport” MCHJ tashkil etiladi.
Izoh (0)