Қозоғистон ва Ўзбекистон ўртасидаги чегара постлари яна очилди. Бу ҳақда «Казинформ»га таяниб, «1news.uz» хабар берди.
Шунингдек, яна учта божхона пунктлари кун-у тун ишлаш режимига ўтади. Бу ҳақда Қозоғистон ва Ўзбекистон чегара божхона органлари вакилларининг ўзаро учрашувида маълум қилинди.
Учрашув давомида Жанубий Қозоғистон вилоятининг Мақтаарал туманидаги «Сирдарё» ҳамда «Жанадауир» назорат пунктларини очиш масаласи, чегарадаги назорат пунктларини кесиб ўтадиган товар ва транспорт воситаларини рўйхатга олиш жараёнларини тезлаштириш, улар орасидаги йўл ва кўприкларни кенгайтириш, «Казигурт», «Қоплонбек», «Отамакон» назорат пункларини тун-у кун ишлаш режимига ўтказиш, чегарани кесиб ўтаётган жисмоний шахслар учун қулай шароитларни яратиш масалалари муҳокама қилинди.
Музокаралар натижасида бир қатор масалалар бўйича қарорлар қабул қилинди. Хусусан, Мақтаарал туманидаги 2008 йилда ёпилган «Сирдарё» ҳамда «Жанадауир» назорат пунктлари июль ойидан ўз ишини қайта давом эттирадиган бўлди.
Бундан ташқари Қозоғистон ҳудудидаги постлар мунтазам янгиланиб турилади ва янги технологияларда ишлашга ўтади. Жумладан, транспорт воситаларининг ҳужжатларини рўйхатга олиш жараёнлари тезлаштирилади. Масалан, ҳозирда ҳужжатларни рўйхатдан ўтказиш учун 38 дақиқа керак бўлмоқда. Янги технологиялар буни 25 дақиқага бажариш имконини беради. Бу эса ўз навбатида чегарадан ўтадиган автомобиллар оқимини 400 тадан 1000 тагача ортишига олиб келади. Биргаликда кўрилган чора-тадбирлар шарофатига чегарани кунига 40 минг нафар одам кесиб ўтиши мумкин бўлади.
Изоҳ (0)