Toshkent pediatriya tibbiyot instituti o‘qituvchi va talabalaridan iborat O‘zbekiston delegatsiyasi Germaniyada bo‘ldi. “Jahon” agentligi xabariga ko‘ra, mazkur o‘quv-tanishuv safari Germaniya akademik almashuvlar xizmatining (DAAD) grant loyihasi doirasida tashkil etildi.
O‘zbekiston delegatsiyasi Berlin va Dyusseldorf universitetlari tibbiyot fakultetlari va Bilefeld shahar klinikasida bo‘lib, mutaxassislar tayyorlash va qayta tayyorlash tizimi hamda zamonaviy tibbiy uskunalardan foydalanilgan holda kasalliklarni tashhislash va davolash usullari bilan tanishdi.
Tomonlar mutaxassislar tayyorlash va ularning malakasini oshirish bo‘yicha muntazam almashuvlarni yo‘lga qo‘yish vositasida o‘zaro hamkorlikni rivojlantirish hamda ularni yanada chuqurlashtirish yuzasidan manfaatdorlik bildirdi.
Berlindagi eng yirik “Sharite” universiteti klinikasining faoliyati bilan tanishuv doirasida mazkur universitet tibbiyot majmuasining talabalari, o‘qituvchi va ilmiy tadqiqotchilari hamda O‘zbekiston elchixonasi vakillari ishtirokida davra suhbati bo‘lib o‘tdi.
Izoh (0)