Qozog‘iston Mudofaa vazirligi respublika Tashqi ishlar vazirligining qozoq harbiy xizmatchilarini Suriyaga jo‘natilishi borasidagi pozitsiyasiga qo‘shilmoqda. Bu haqda “RIA Novosti”ga Qozog‘iston Qurolli kuchlarining bosh shtabi rahbari vazifasini bajaruvchi Adilbek Aldabergenov ma’lum qildi.
Qozog‘iston Tashqi ishlar vazirligi 23-iyun kuni, Qozog‘iston o‘z harbiy xizmatchilarini Suriyaga yuborish borasida hech kim bilan muzokaralar olib bormayotganini ma’lum qilgandi. Vazirlikning ta’kidlashicha, Suriyadagi to‘rtta deeskalatsiya zonalarining xavfsizligi va samaradorligini ta’minlash masalasi ayni vaqtda Ostona jarayonining kafil-mamlakatlari vakolatida bo‘lib, bu va boshqa masalalar 4—5-iyul kunlari Ostonada bo‘lib o‘tadigan uchrashuv jarayonida muhokama qilinadi.
Tashqi ishlar vazirligining bayonotiga ko‘ra, Qozog‘iston uchun o‘z tinchlikparvar kuchlarini dunyoning ixtiyoriy qaynoq nuqtasiga yuborishni ko‘rib chiqish masalasi juda muhim bo‘lib, u BMT Xavfsizlik kengashi rezolyutsiyasi va shu xalqaro tashkilotning tegishli mandatlari qaroriga bog‘liq.
“Rossiyaning Qozog‘iston habiylarini Suriyaga yuborish taklifiga tegishli so‘rovi o‘rganib chiqilib, Qozog‘iston Respublikasi Tashqi ishlash vazirligi tomonidan ushbu masalaga rasmiy izoh berilgan. Qozog‘iston Respublikasi Mudofaa vaziriligi TIV e’lon qilgan rasmiy bayonotdagi pozitsiyaga qo‘shiladi”, — deya agentlikka javob berdi Aldabergenov.
Avvalroq, Turkiya prezidentining vakili Ibrohim Qalin Rossiya Suriyadagi deeskalatsiya zonalariga Qirg‘iziston va Qozog‘iston harbiylarini yuborish taklifini berganini ma’lum qilgandi. Davlat dumasi qo‘mitasining rahbari Vladimir Shamanov Rossiya ushbu ikki davlat bilan harbiylarni Suriyaga yuborish borasida muzokara olib borayotganini tasdiqladi.
Izoh (0)