Nyu-Yorkda sobiq shifokor otishma uyushtirdi. Bir kishi halok bo‘ldi, olti nafar odam jarohat oldi

Nyu-Yorkda sobiq shifokor Bronks-Lebanon kasalxonasida otishma uyushtirishi oqibatida bir kishi halok bo‘ldi, olti nafar inson jarohat oldi, deb xabar berdi Meduza.

Halok bo‘lgan fuqaro kasalxonada shifokor bo‘lib ishlagan. Shuningdek, jarohat olganlar orasida kasalxona xodimlari ham bor, ulardan besh nafarining ahvoli og‘ir.

Xabar berilishicha, hujumni uyushtirgan shaxs AR-15 miltig‘ini kasalxona hududiga tibbiyot xodimlari kiyimi ostida yashirib olib kirgan. U politsiya yetib kelguniga qadar o‘zini otib o‘ldirgan. Bundan oldin u o‘zini yoqib yuborishga harakat qilgan.

OAV ma’lumotlariga ko‘ra, hujumni ushbu kasalxonada oilaviy shifokor bo‘lib ishlagan 45 yoshli Genri Bello uyushtirgan. Associated Press’ning ma’lum qilishicha, 2015-yilda u jinsiy tegajoqlikda ayblanib, ishdan bo‘shashga majbur bo‘lgan.

Reuters agentligi uni asli AQShga ko‘chib kelgan Nigeriya fuqarosi deb yozmoqda.