Oq uy apparatining 377 nafar xodimi, shuningdek, AQSh prezidenti Donald Trampning maslahatchilari va yordamchilarining maoshlari amaldagi ma’muriyatning AQSh Kongressiga yuborgan ochiq hisobotida e’lon qilindi. Amaldorlarning yillik ish haqi 30 mingdan 179 ming dollargachani tashkil etadi, deb xabar berdi “TASS”.
Hisobotda AQSh prezidentining kuyovi hamda yuqori siyosiy maslahatchisi Jared Kushner, shuningdek, AQSh prezidentining maslahatchisi vazifasini bajaruvchi qizi Ivanka Tramp maosh olmasligi haqidagi ma’lumotlar tasdiqlangan. Hujjatda ularning davlat g‘aznasidan oladigan daromadi nolga teng deb ko‘rsatilgan.
Oq uyning asosiy vakillari — xodimlar apparatining rahbari Rayns Pribes, Oq uyning rasmiy vakili Shon Spayser, bosh siyosiy strategi Stiv Bennon hamda bosh maslahatchi Kellienn Konueylarning maoshi yiliga 179,7 ming dollarni tashkil etadi. Oq uy matbuot kotibining o‘rinbosari Sara Sanders 165 ming dollardan sal kamroq maosh oladi. Eng katta maoshni prezidentning siyosiy bosh maslahatchisi Mark Xaus oladi — 187 ming dollar.
Oq uydagi 377 nafar xodimlar orasida eng kam maosh oladigan odam — bu Oq uy qoshidagi milliy iqtisodiy kengash rahbari Geri Kon. Uning maoshi 30 ming dollarni tashkil etadi.
Izoh (0)