Amerikaning New York Post gazetasi AQSh prezidenti Donald Trampga bag‘ishlangan uchta so‘zdan iborat maqolani chop etdi, deb xabar berdi “TASS”.
“Trampning tvitlari” sarlavhasi ostida chiqqan maqola nashr tahririyatining fikri aks ettiriluvchi materiallar o‘rin oladigan bo‘limda chop etilgan. Unda “To‘xta. Shunchaki to‘xta” deya yozilgan.
New York Post maqolaning elektron versiyasi joylashtirilgan o‘zining saytida, Tramp o‘zini tanqid qilgan MSNBC telekanalining ikki nafar boshlovchisini haqorat qilgan tvit’iga havola berib ketgan.
29-iyun, payshanba kuni Tramp o‘zining Twitter’dagi sahifasida MSNBC telekanalining yangiliklar dasturi boshlovchilari Mika Bjezinski va Jo Skarboroni qo‘pol haqorat qilgan. Prezident ulardan birini “telba”, ikkinchisini “savdoyi” deya atagan.
Shundan so‘ng Tramp OAV va Respublikachilar partiyasi vakillarining tanqidlari ostida qolib ketdi. MSNBC telekompaniyasi Trampning so‘zlarini qoralab bayonot berdi. Oq uy vakili Sara Xakabi-Sanders o‘z navbatida prezident himoyasiga chiqish qilib, u “zarbaga qarshi zarba bilan javob bermoqda” va prezidentni tanqid qilayotgan “liberal OAV o‘zini qo‘rqitishiga yo‘l qo‘ymaydi” dedi.
Tramp inauguratsiyadan keyin prezidentning Twitter’dagi rasmiy akkauntini ishlatishni boshlagan, biroq o‘zining shaxsiy sahifasida ham xabarlar yozishni davom ettirib kelayotgandi. Avvalroq, Tramp “O‘z fikrlarimni ijtimoiy tarmoqlar yordamida jamiyatga yetkazish imkoniyati bo‘lmaganida, hech qachon AQSh prezidenti lavozimida o‘tirmagan bo‘lar edim”, deya ma’lum qilgandi.
Izoh (0)