O‘zbekiston Prezidenti Shavkat Mirziyoyev Toshkentning Mirzo Ulug‘bek tumaniga tashrifi davomida Ichki ishlar vazirligi akademiyasida bo‘ldi. Bu haqda O‘zA xabar bermoqda.
Hozirda IIV akademiyasida mavjud bino va inshootlarni qurish va ta’mirlash ishlari olib borilmoqda. O‘zbekiston Prezidenti 2017—2021-yillarda IIV akademiyasini rivojlantirishning beshta ustuvor yo‘nalishi bo‘yicha loyihalar bilan tanishdi.
Shavkat Mirziyoyev sohada yuqori malakali, professional kadrlar tayyorlashni yo‘lga qo‘yish, shaxsiy tarkibning kasb mahorati, ma’naviy-ma’rifiy, huquqiy bilimini puxta shakllantirish borasida tegishli ko‘rsatmalar berdi.
Ma’lumot uchun, O‘zbekiston Ichki ishlar vazirligi akademiyasi Markaziy Osiyoda huquqni muhofaza qilish organlari uchun kadrlar tayyorlash bo‘yicha eng yirik oliy ta’lim muassasalaridan biri hisoblanadi. Akademiya Vazirlar Mahkamasining 1994-yil 2-sentabrdagi qarori asosida tashkil etilgan.
Akademiyaning to‘rtta zamonaviy o‘quv binosi, tinglovchilar uchun ikkita yotoqxona, mehmonxona va boshqa zarur inshootlari bor. Tinglovchilar bilan o‘quv mashg‘ulotlari o‘tkazish uchun 18 ma’ruza zali, 150 o‘quv auditoriyasi va o‘quv-metodik kabinet, uchta sport zali va suv havzasiga ega bo‘lgan sport majmuasi, tennis korti va atletik tayyorgarlik bilan shug‘ullanish uchun sport maydonchalari, ikki galereyali o‘q otish tiri, kriminalistik poligon, yopiq televideniye tizimiga ega bo‘lgan telemarkaz, eng zamonaviy kompyuterlar bilan jihozlangan 20 kompyuter sinfi va boshqalar mavjud.
Tinglovchilar 500 mingdan ortiq nusxadagi o‘quv, ilmiy, ijtimoiy-siyosiy, maxsus va badiiy adabiyotni, davriy nashrlarni o‘z ichiga olgan 4 kutubxona xizmatidan foydalanadi. Bu yerda zamonaviy kompyuter va matbaa uskunalari bilan jihozlangan bosmaxona faoliyat ko‘rsatmoqda.
Haqiqiy vaziyatga yaqinlashtirilgan sharoitlarda amaliy mashg‘ulotlar o‘tkazish uchun akademiyaning shahardan tashqaridagi harbiy-dala o‘quv markazi mavjud. Bu yerda 600 kishiga mo‘ljallangan ma’ruza zali, o‘quv sinflari, taktik shaharcha, ommaviy qirg‘in qurolidan saqlanish shaharchasi, havo kemasida qurollangan jinoyatchilarni qo‘lga olish operatsiyalarini o‘rganish uchun “YaK–40” samolyoti, “SXRON” yer osti majmuasi – avtomat, karabin, snayperlar miltig‘i va to‘pponchadan o‘q otish maydoni mavjud.
Bu yerda tinglovchilar va xodimlarning salomatligini tiklashi va dam olishiga alohida e’tibor qaratiladi. Akademiya hududida 30 o‘ringa mo‘ljallangan tinglovchilar “minipoliklinikasi” faoliyat ko‘rsatmoqda. Butun hudud ko‘kalamzorlashtirilgan, gulzorlar yaratilgan, 10 favvora ishlab turibdi.
Izoh (0)