O‘zbekiston Prezidenti Shavkat Mirziyoyev 29-iyun kuni Toshkent shahrining Mirzo Ulug‘bek tumanidagi Krantas Group zavodiga tashrif buyurib, qurilish uchun maxsus texnika ishlab chiqaruvchi korxonalar faoliyati bilan tanishdi. Bu haqda O‘zA xabar bermoqda.
Prezident mazkur korxonada ishlab chiqarilayotgan maxsus texnika vositalari va ishlab chiqarish jarayonini ko‘zdan kechirarkan, shu sohaga ixtisoslashgan oliy ta’lim muassasalarida kran va maxsus texnikalar ishlab chiqarish bo‘yicha yiliga 20-25 mutaxassis tayyorlovchi fakultetlar ochish va yoshlarni o‘qitish zarurligi qayd etdi.
Avvalroq O‘zbekiston Prezidenti Shavkat Mirziyoyev Krantas zavodiga tashrifi davomida maxsus texnika importini kamaytirish haqida topshiriq bergani haqida xabar berilgan edi.
Ma’lumot uchun, 2008-yilda Toshkent tajriba eksperimental mexanika zavodi negizida tashkil etilgan Krantas va “Kranlar va maxsus texnika” korxonalarida hozirda 60 turdan ziyod maxsus texnika, jumladan, avtokranlar, kran manipulyatorlari, yonilg‘i va kislota tashuvchi avtotsisternalar, kommunal texnika, samosvallar, avtoustaxonalar, avtogidroko‘targichlar ishlab chiqarilmoqda.
Korxonalarda 2017—2018-yillarda yuk ko‘tarish quvvati 100 tonna bo‘lgan avtokranlar va ko‘p qavatli uy-joylar qurilishiga mo‘ljallangan 8 tonnalik minorali kranlar ishlab chiqarish loyihalashtirilgan. Shuningdek, eksport hajmini 5 million dollarga yetkazish, Qozog‘iston, Tojikiston, Turkmaniston, Afg‘oniston kabi davlatlarga mahsulot eksport qilish rejalashtirilgan.
Izoh (0)