Gollivud aktyori Jonni Depp Britaniyadagi Glastonberi musiqa festivalida AQSh prezidenti Donald Trampning o‘ldirilish ehtimoli haqida gapirgani uchun uzr so‘radi. Bu haqda People nashri ma’lum qildi, deya xabar beradi “TASS”.
“Prezident Tramp haqida xunuk va qo‘pol hazil qilishga uringanim uchun kechirim so‘rayman. Bu men o‘ylagandek bo‘lib chiqmadi, yomon niyatim yo‘q edi. Kimgadir ziyon yetkazmoqchi emas, to‘planganlarning vaqtini chog‘ qilmoqchi edim, xolos”, — deyiladi aktyorning jurnalga taqdim etgan bayonotida.
22-iyun, payshanba kuni Glastonberi musiqa festivali mehmonlari bilan uchrashuvi chog‘ida Depp Trampning nomi tilga olinganida “Oxirgi bor aktyor qachon prezidentni o‘ldirgan?”, — deya savol berdi. OAV u 1865-yil 14-aprelda AQShning 16-prezidenti Avraam Linkolnning o‘ldirilishini nazarda tutganini taxmin qildi. O‘shanda aktyor Jon Uilks But to‘pponchadan Linkolnning boshiga o‘q uzib, yaralagan edi.
Ertasiga, 23-iyun kuni vazifalari qatoriga Donald Trampni qo‘riqlash ham kiradigan AQSh Maxfiy xizmati Deppning aytganlariga izoh berdi. Xizmat matbuot va ijtimoiy tarmoqlarda paydo bo‘ladigan Oq uy xo‘jayiniga tahdid bilan bog‘liq har qanday ma’lumot diqqat bilan kuzatib borilishini ma’lum qildi.
Izoh (0)