Eron xavfsizlik xizmati mamlakatning diniy ziyoratgohlarida bombalar va terrorchi-xudkushlar vositasida teraktlar uyushtirishni maqsad qilgan IShIDga aloqador guruh a’zolarini qo‘lga oldi. Bu haqda “Gazeta.ru” xabar bermoqda.
Tasnim agentligi ma’lumotlariga ko‘ra, qo‘lga olingan shaxslarning yonidan portlovchi uskunalar, terrorchi-xudkushlarning kamarlari, uchta “Kalashnikov” avtomati, pulemyot, tunda ko‘rish imkonini beruvchi ko‘zoynaklar, masofadan turib portlatish imkonini beruvchi uchta telefon, ko‘plab patronlar va boshqa vositalar topilgan.
Eronning Islomiy inqilob soqchilar korpusi 18-iyun kuni Suriya sharqidagi terrorchilar bazasiga raketa zarbalarini berganini ma’lum qilgan edi.
7-iyun kuni Tehronda ikkita terakt amalga oshirilgan edi: Eronning birinchi oliy rahbari, oyatulloh Humayniy maqbarasi oldida terrorchi-xudkush o‘zini portlatib yuborgan va mamlakat parlamentiga qurolli hujum uyushtirilgan. Ushbu teraktlar uchun javobgarlikni IShID o‘z zimmasiga olgan edi.
Izoh (0)